A arquitectura indiana na vila de Ponte Caldelas

Fermosos edificios construídos nos primeiros anos do século XX e que viñeron a reforzar o carácter urbano da vila termal. A elegancia arquitectónica dalgúns deste inmobles, as súas cualidades materiais e formais, o interese por destacar por riba dos inmobles autóctonos seguen sorprendendo aos que visitan por primeira vez Ponte Caldelas. Os seus promotores importaron os modelos construtivos de Brasil. Son edificios que mesturan a cantería de alta calidade con paramentos cubertos por azulexos polícromos, que decoran as súas fiestras con motivos modernistas e que cubren o balcón principal con galerías de forxa. Múltiples influencias formais que se dan cita no chamado estilo ecléctico. Outros deixanse influir polos estilos históricos. Esquemas e modelos que eran moi alleos ao que se viña facendo aquí e que levantaron non poucas críticas por parte do galeguismo histórico. Hoxe en día son inmobles aprezados e convertidos en pezas patrimoniais que hai que conservar.