Comentarios á novela "Jim ante el espejo"

"Jim ante el espejo" é unha novela da autora sueca Inger Edelfeldt. Trata da historia dun adolescente que vai descubrindo pouco a pouco a súa personalidade e a súa sexualidade. Todo isto provoca trocos importantes na súa vida. O seu enfrontamento contra os estereotipos fabricados pola sociedade, a incomprensión dos seus pais, as dúbidas persoais que estes enfrontamentos lle crean e a súa valentía para reafirmarse ante os demais son ingredentes que calquera adolescente pode valorar e aprezar. Pero por riba de todo está a sutileza coa que a autora aborda o tema da homosexualidade. Elegancia no tratamento do tema non exenta de dureza pola cruel realidade á que están sometidos milleiros de seres humanos por mor de hipócritas e absurdas regras morais.


Cuestionario para o comentario da novela.

1. Describe a personalidade de Jim con trazos extraídos da novela.
2. Como vai a evolucionar a súa personalidade?
3. Como describirías o ambiente familiar: a súa nai, o seu pai, as obsesiónsde ambos, a relación que mantiñan como parella...
4. A novela está escrita en primeira persoa , pero no comezo de cada capítulo hai unha intervención da nai como se fora unha confesión a unha psicoanalista reflexionando sobre os acontecementos centrais da novela. Como valoras estes comentarios? Había coincidencia entre a visión que tiña a nai da evolución de toda a historia e a visión que tiña o propio protagonista? A que cres que pode deberse?
5. Como era a relación de Jim cos seus compañeiros de escola?
6. Que expectativas tiña o pai sobre Jim? Como xulgas este feito?
7. Que estratexias utilizou Jim para ir superando os seus medos?
8. Cando comeza a advertir que os seus gustos sexuais eran diferentes aos da maioría?
9. De que se culpabiliza a súa nai constantemente?
10. Que significa a entrada de Matt na vida de Jim?
11. Como reacciona a familia ante a nova situación?
12. Por que Jim utiliza o recurso da provocación?
13. Cres que os problemas de Jim finalizan cando se enfronta aos máis próximos?
14. Obtiveches algunha conclusión despois de ler esta novela?
15. Recomendarías a alguén a súa lectura? Por que ?