1848, un ano crítico que desata revolucións en medio Europa

Todos os avances sociais chegan porque hai colectivos que toman conciencia da necesidade de modificar as leis para ampliar dereitos e vencer situacións de inxustiza. Os avances sociais non foron doados de implantar. O Estado liberal consolidado tras os procesos revolucionarios anteriores estaba controlado pola alta burguesía. A participación política seguía estando reducida a unha minoría da poboación. Mentres, a expansión económica e industrial nos países da Europa Occidental estaba a provocar un aumento do proletariado. O protagonismo crecente que asume esta clase social, a súa conciencia política e o apoio dos pensadores socialistas na organización das súas reivindicacións fai desta revolución o primeiro ensaio para democratizar o estado burgués e a demostración de que a partir de aquí a burguesía terá que empregar a violencia institucional do Estado para frear as peticións das clases traballadoras.
Ao liberalismo e nacionalismo propiamente burgués hai que sumar a aparición da ideoloxía socialista como as grandes correntes de pensamento que protagonizarán a vida política no que resta do século XIX.
Para entender o acontecido na revolución do 48 recomendamos unha lectura da seguinte ligazón:  http://www.claseshistoria.com/revolucionesburguesas/revolucion1848.htm

Despois elabora un comentario do seguinte texto, averiguando o maís significativo do seu autor:

“A revolución de 1848 debe considerarse como a continuación da de 1789, con elementos de desorde de menos e elementos de progreso de máis.


Luis Felipe non comprendeu toda a democracia nos seus pensamentos (...) Fixo dun censo de diñeiro o signo e título material da soberanía (...) Nunha palabra, el e os seus imprudentes ministros colocaron a súa fe nunha oligarquía, en vez de fundala sobre unha unanimidade. Non existían escravos, pero existía un pobo enteiro condeado a verse gobernar por un puñado de dignatarios electorais (...).”

Lamartine, A. Historia da revolución de 1848.